(അന്വേഷണ ഉദ്യോഗസ്ഥന്റെ വെളിപ്പെടുത്തലോടെ നിരപരാധിയെന്ന് വെളിപ്പെടുത്തപ്പെട്ട, രാജിവ് ഗാന്ധി വധക്കേസിൽ തൂക്കിക്കൊല്ലാൻ വിധിക്കപ്പെട്ട പേരരിവാളന്)നീ അറിവാണ്
രാജ കിങ്കരനാൽ മാറ്റിയെഴുതപ്പെട്ട അറിവ്
അറിഞ്ഞതും അറിയിച്ചതും
പറഞ്ഞതും പറയിച്ചതും തെറ്റാണെന്നുള്ള അറിവ്
നീ തിരിച്ചറിവാണ്
കിങ്കരന്മാർ എഴുതിയ ചരിത്രപുസ്തകങ്ങൾ
എന്താണെന്നുള്ള തിരിച്ചറിവ്
ശിലാ ലിഖിതങ്ങൾ ഒറ്റിക്കൊടുത്തു
പടച്ചതാണെന്ന തിരിച്ചറിവ്
നീ അറിയിപ്പാണ്
മുറിവേറ്റവന്റെ വിമോചനനാൾ
വിളിച്ചോതുന്ന അറിയിപ്പ്
അന്ത്യനാൾ എത്തും മുൻപ്
ഉയിർപ്പ് നേടുന്നവന്റെ മുന്നറിയിപ്പ്
നിന്നിലൂടെ നാം അറിയുകയാണ്
വിധിയെഴുതുകാരന്റെ പേന
ഭരിക്കുന്നവന്റെ വേലക്കാരനാണെന്ന്
രാജഭടന്റെ വീരമുദ്രകൾക്ക്
നിന്റെ ചോരയുടെ മണമുണ്ടെന്ന്
