സ്ത്രീയേ ആരാണ് നീ?

സ്ത്രീയേ ആരാണ് നീ?
ഇതാണ് ഇന്നത്തെ സംശയം.ഇന്നതെതല്ല,എന്നത്തേയും..

എന്റെ വിശന്ന കുഞ്ഞു ചുണ്ടുകളിലേക്ക്‌,
നിന്റെ മുലപ്പാല്‍ ഒഴുക്കുമ്പോള്‍,
നീ എന്നെ വിളിച്ചു, "കുഞ്ഞേ.." എന്ന്!

പിന്നീട്,മണ്ണപ്പം ചുടുവാന്‍,
കൊച്ചു പാവാടയിട്ടു പിന്നാലെ വന്നപ്പോള്‍,
നീ വിളിച്ചു,"ചേട്ടാ.." എന്ന്!

 രാത്രികളിലെ യാത്രകളില്‍,
ഞാന്‍ നിന്റെ കാവല്ക്കാരനായപ്പോള്‍,
എന്റെ കരങ്ങള്‍ മുറുകെപ്പിടിച്ചു ,
നീ വിളിച്ചു "സുഹൃത്തേ.." എന്ന്..

 തിളയ്ക്കുന്ന പോരാട്ടഭുമിയില്‍,
ജല പീരങ്കികള്‍ ചോരയെ കഴുകിക്കളയുമ്പോള്‍,
മുഷ്ട്ടിച്ചുരുട്ടി നീ എന്നെ വിളിച്ചു,"സഘാവേ.." എന്ന്!

ഉരുകിയൊലിക്കുന്ന കാമം,
വിയര്‍പ്പു ചാലുകള്‍ തീര്‍ത്തപ്പോള്‍,
എന്റെ കാതിനുള്ളില്‍ കടന്നു-
നീ വിളിച്ചു "പ്രാണനെ.." എന്ന്!!

എങ്കിലും,തീരാതെ ഒരു സംശയം ബാക്കി നില്‍പ്പുണ്ട്.
സ്ത്രീയേ, ആരാണ് നീ?